torsdag 28. mars 2013

VÅR I DRIVHUSET

                                     BLOGGTØRKE
Eg vart rimeleg overraska då eg såg at siste innlegg var for meir enn to månader sidan. Men det er ikkje verre enn at alt står vel til vel til med både plantene og meg. Såinga starta rett etter nyttår og held fram enno. For 2 veker sidan flytta eg inn i drivhuset med planter og i dag sette eg meg ut og prikla nokre stauder.

Pelargonia som har overvintra i isoporkasse.

Desse geraniumane har vokse godt etter at dei kom ut i drivhuset, så idag har eg potta dei om i større potter.

Blodbegerplantene er ikkje så store enno, men dei ser ut til å verte tette og fine.

Nokre av Dahliane, sommargeorginene er alt komne i større potter og er i god vekst.

I år har eg sådd Ageratum, blåkorg, dei spirte flott og no vert dei tette og fine.

Det har vore ein usedvanleg kald vår. Det trur eg at eg har uttalt kvart å dei siste åra etter at eg fekk drivhus. Men i år er det verkeleg kaldt. Dalsvatnet har 50 cm is, og det må truleg vere rekord, iallefall er det ikkje noken eg har høyrt som hugsar meir is. No ser eg at Yr trur at nattetemperaturen skal verte rundt 0 om ein par dagar. Så då vil nok telen byrja å sleppe, slik at eg kan få rydda litt i beda.
Kulden er ikkje berre her, det ser ut til at det er usedvanleg kaldt over heile landet. Eg skal ikkkje klage, kjem det seg no så vert det nok flott.


Til venstre her står 3 Anthirrinum, løvemunn, som og har overvintra i isoporkassar ilag med Fuksia og Pelargonia. Eg ser at etter 2 veker med lys og jord rundt røtene så er dei igang med veksten.


Knollgeorginene har hatt vinteropplag i planterommet, og der har dei hatt det fortreffeleg i vinter og. Eg skal potte dei opp etter påske når eg får kjøpt meir jord.

Denne fuksiaen og ei til har stått i plastpose i same frostfrie blindkjellaren, utan lys og dei er klar for potte og sommaren.

Eg sådde Abutilon, stuelønn, som eg sådde for eitt år sidan, dei største har overvintra inne, desse var så små at eg tenkte dei ville ikkje overvintre, men livsviljen er der, så etter ein vinter i isoporkassar så skal dei få godt stell i sommar, for å få komme inn i stova til vinteren att.

lørdag 5. januar 2013

Vinter i hagen?

Cyclamen neapolitanum, alpefiol, eg fekk 2 planter av frøa eg kjøpte frå Jungelseeds. Enno står begge friske og fine, trass i alt regnet som har vore og er. I dag er det 5,8 C og eg tok med meg ei runde i hagen for å sjå om det var noke som var friskt og grønt.

Linaria purpurea, purpurtorskemunn

Tellima grandiflora

 Akeleiene er tidleg ute med dei første lysegrøna rosettane sine.
 Polemonium pauciflorum, trompetflokk.

Kva denne heiter veit eg ikkje, det er ei arveplante.
 Helleborus niger, kvit julerose, med masse knoppar. Eg har sett at eg kanskje burde flytte denne til ein plass der ho kan vere meir verna mot regn. Blomane vert litt prega av fukt og væte.
Denne derimot, Helleborus corsicus, tåler det meste. Så blomstrar ho litt seinare og og då er den verste regntida over.

fredag 4. januar 2013

Frø, frø, frø,,,,,


Omslaget till TA 4/2012

 
2034 ulike variantar av frø kunne eg velje mellom i STA si frøliste som kom før jul.
Så måtte eg velje 20 av dei eg hadde mest lyst på, det var jo sjølvsagt ei uoverkommeleg oppgåve. Sidan energinivået mitt i det siste har vore på eit lågmål så var det heilt i siste liten at eg klarte å ta fatt på lista. I går fekk eg sendt av stad bestillinga, pluss ein del reserve i tilfelle dei gjekk tom for dei sortane eg hadde mest lyst på.
I dag har eg vore på planterommet og sådd lobelia, asarina og blodbeger. I tillegg fekk eg sådd Magnarfrøa som eg ikkje hadde overskot til å så før jul. Du og du kor ein herleg følelse det var å setje seg ned i ro med frøposane og spre frøa i den svarte passeleg fukta jorda.
Dette er  fjerde sesongen min med planterom som er tilpassa å ale opp frøplanter til eg kan flytte plantene ut i drivhuset. Planterommet er egentleg vaskerommet mitt, men det er lite som minner om vaskerom i tida frå januar til april, då eg flytter ut dei siste plantene.
Eg har tre hyller med plantelys over, temperaturen i romet er omlag 15 C. So har eg fått opp hyller til tomme potter og anna som eg treng. Eg brukar plastfolie til å dekke pottene med fram til frøa spirer. Dei fleste sortane spirer greitt i denne temperaturen, men dei som treng meir får stå på badegolvet og då skjer det som regel fort. Då må eg passe godt på slik at eg flyttar pottene med småspirene i lys slik at dei ikkje vert for lange i mangel på lys.
Etter spiring set spirene og som regel pris på litt lægre temperatur så då er det ideelt på planterommet.
Temperaturen ute dei siste dagane har veksla mellom 2 og 7 grader, det har regna dag og natt, men no ser det ut til at i løpet av neste veke skal det verte litt betre.
 

Godt nytt år til alle som besøkjer bloggen min og som legg att hyggelege kommentarar. No tek vi til på ei tid der dagane gradvis vert lysare og vi kan snart gå ut å kike etter dei første teikna til dei første vinter/vårblomane.

lørdag 22. desember 2012

mandag 15. oktober 2012

Fargar om hausten

Anne på Moseplassen har utfordra oss til å delta i konkurranse med bilete av Høstblader, det er alltid kjekt å ta del i konkurransane hennar. Denne gongen og ofte tidlegare gonger så kan ho lokke med supre premiar. Men for eigen del så deltek eg, i tillegg til at eg har kjempelyst på premie, for utfordringa sin del. Denne gongen har eg hatt fleire turar rundt huset for å finne gode motiv. Vinnaren min denne gongen vert biletet under.

Cobea scandens og Rhodochion atrosanguineus, klokkeranke og blodbeger. Desse to har ikkje dei vanlege haustfargane, men fargane dei får om hausten passar godt ilag og dei er berre heilt nydelege. Desse to plantene har eg i ei stor potte, og dei kler stammen på ein apal. 
Andre motiv som eg og likte kjem under, og kanskje hadde dei vore lettare å vinne fram med i konkurransen, men eg likte så godt fargen og forma på lauva over.











lørdag 13. oktober 2012

HAUST

Phlox og Lobelia

Denne brukar å vere som ein magnet på humler og sommarfuglar, men i år er dei totalt fråværande. 
Ei sjølvsådd Alonsoa meridionalis, Vippeblomst, som held stand mellom rosene.

Eg tok opp Dahliaknollane for 2 veker sidan og då kom denne fram att, Helleborus corsicus, med varigert lauv, imponerande vekstkraft i denne sorten juleroser.

                                 



Heuchera, alunrot, ilag med Marikåpe.

 Astrantia major, stjerneskjærm, eg sådde dei i 2010 og plata dei ut i år, ganske små planter enno, men fine, eg håpar dei veks seg store med tida.

 Ein eller annan art av Skjærsmin står vakkert mot blå hausthimmel.

Er ikkje dette ein vakker kløver kanskje? Det er Trifolium rubens.

Andre året eg har sådd Coben scandens, Klokkeranke. Dei treng  lang tid på å setje blomst, men der eg er ute etter flotte haustfargar, så er dette eit godt alternativ.


Cornus alba Sibirica Variegata får fine haustfargar.

Eg har fått inn alle potter med Fuchsia i drivhuset, men har ikkje pakka ned plantene enno. 
I går fekk eg operert venstre handledd, karpaltunnelsyndrom, så no lt eg halde meg unna hagearbeid for ei tid. Men for eit hagemenneske som meg, som startar frøsåinga og sesongen om 2 og ein halv månad så hadde eg ikkje kunne planlagd tidspunktet betre sjølv. 
Ynskjer dokke alle ei god helg!