Vinter i hagen?

Cyclamen neapolitanum, alpefiol, eg fekk 2 planter av frøa eg kjøpte frå Jungelseeds. Enno står begge friske og fine, trass i alt regnet som har vore og er. I dag er det 5,8 C og eg tok med meg ei runde i hagen for å sjå om det var noke som var friskt og grønt.

Linaria purpurea, purpurtorskemunn

Tellima grandiflora

 Akeleiene er tidleg ute med dei første lysegrøna rosettane sine.

 Polemonium pauciflorum, trompetflokk.

Kva denne heiter veit eg ikkje, det er ei arveplante.

 Helleborus niger, kvit julerose, med masse knoppar. Eg har sett at eg kanskje burde flytte denne til ein plass der ho kan vere meir verna mot regn. Blomane vert litt prega av fukt og væte.

Denne derimot, Helleborus corsicus, tåler det meste. Så blomstrar ho litt seinare og og då er den verste regntida over.

APRILRAPPORT

Dette er Helleborus corsicus/argutifolius  som eg sådde i januar 2010 og som eg har skrive om tidlagare, no står den første i blomst, dei andre har knoppar og så dei kjem nok litt seinare. Blomane er mest grøne og er ikkje mellom dei som lyser opp i bedet, men eg tykkjer ho har sin sjarm og ho har kraftig flott bladverk. Det er mange knoppar på kvar  stengel. Eg har tidlegare skrive at denne har varigerte blad, det har ho for såvidt enno, men no er dei meir einsfarga.

I drivhuset er det ganske fullt, men eg skal no klare å sprenge inn nokre planter til, i tillegg til at her er masse planter som må få eit nummer større potter. Eg har montert opp ventilen som regulerar takluka, så har eg varmeomn på om natta.

Desse pottene gjorde eg klar til påske, og hadde eg ikkje visst betre så kunne eg trudd dei var av plast, det har vore så kjølig at det har vore lite utvikling. Dei står attmed gangdøra og der skin sola frå sør, i tilfelle ho skin, så det pleier ikkje vere så lenge før slike potter seier takk og farvel, men denne kan godt stå litt til. No er det endeleg meldt om litt meir sol, så då må potteinnhaldet bytast ut snart.

 Eg skreiv i bloggen for ein månad sidan at vi hadde slege plenen, det var heilt sant, men no kan eg legge til at etter den tid har plenklipparen stått stilt.

I 2011 starta eg med å ta bilete frå gangdøra, det vil eg halde fram med i år ogso, for det viser tydeleg utviklinga som skjer i hagen. 

Desse flotte oxalisane var med Engletrompeten som eg var så heldig å vinne på Marit sin blogg. Eg tykkjer at fargen på desse var utruleg flott, så desse knollane skal få like stor omsorg som engletrompeten. Engletrompeten har eg no potta opp i ei stor potte og han ser verkeleg ut til å trivast. Han står inne i drivhuset enno, kanskje kjem han på plass ved gangdøra til sommaren. Eg gler meg til å sjå han i blomst, eg har nemleg berre lese om engletrompetar så no skal eg endeleg sjå dei og lukte på dei. 

Det er ikkje så mykje som blomstrar i drivhuset enno, men det er heilt greitt, det kjem nok etterkvart. Lobeliaene er såvidt igang med å blomstre, eg brukar å kutte dei ned nokre gonger for å få tette fine planter, men noken knoppar sparar eg for å glede meg over litt blomar. Det er egentleg mykje arbeid med å få fram fine lobeliaplanter, og i fjor bestemte eg meg for at i år skulle eg ha mykje mindre, men frø og planter lever litt sitt eige liv, og i år fekk eg voldsomt tilslag på spiringa -   så då så.

I fjor sådde eg Nicotiana alanta utan å få spiring, men eg ville ikkje gje opp, for det er planter eg likar, i år sådde eg Nicotiana langsdorfi, Cream Splash og Nicotiana x sandrae, Fragant Cloud, (biletet) og dei har spirt villeg vekk og veks gjer dei og.

 

Dette er spede spirer av ulike artar Paeonia som eg har fått fram frø frø. Eg har nokre fleire frøpotter med peonfrø som eg ventar på.

Dette er Schizanthus wisetonensis, Hagesplittblomst, ein heilt ny sommarblomst for meg. Den vert og kalla fattigmannsorkide fordi blomane vist skal likne på orkidear. Dei har iallefall stor vekstkraft så vert det spennande å sjå korleis den kjem til å klare seg til sommaren.

Det har vore travle tider i drivhuset no, så når kvelden kjem så vert det fort leggetid.Det har vorte lite tid til å lese hagebloggar, som gir meg så mykje, og endå mindre til til å skrive kommentarar. De får bere over med meg, vi har det vel travelt alle, vi får ta det att til hausten. No brukar eg iallefall alle krefter ute i alt som spirer og gror. Det er og så godt å høyre på alle småfuglane som er travelt opptekne med alt sitt no i desse tider. 

Til alle som måtte vere innom bloggen så ynskjer eg dokke ei god veke og ein god vår, og takk for alle positive og hyggelege kommentarar som de legg att!

GODT NYTT ÅR 2012

Helleborus niger i knopp, denne kjøpte eg i potte våren 2011, og planta ho ut i bedet då telen gjekk. Ho har vokse seg godt til og no står ho med mange knoppar som snart er klar for å opne seg.
I dag har eg sjekka haustens staudesådd, og eg kunne berre sjå spiring på eit frø av Helleborus niger.  Eg er vorten veldig glad i alle sortar Helleborus og kjøper frø når eg kjem over dei, så får eg sjå om det kan verte ei samling til slutt. Eg hugsar eg las om juleroser og alle andre Helleborus artar for mange år sidan i Norsk hagetidend og tenkte at dei kunne eg ha lyst på, men det såg vanskeleg ut, eg rekna ikkje med å kunne tilfredsstille krava til planta og langt mindre få tak i planter eller frø.
Men no vert julerosa tilbydd i alle butikkar i heile vinterhalvåret og dei ser ut til å trivast godt. Så no er eg spent på korleis det går med dei som no veks frå frø. Helleborus corsicus som spirte frå frø våren 2011 veks voldsomt, iallefall den som står innimellom to roser. Eg las ein stad at den kunne ta nokre år før Helleborus blomstra, men dei har eit flott og kraftig bladverk som pyntar opp medan eg ventar.
Eg har ei Helleborus orientales som eg kjøpte på eit planteutsalg for noken år sidan og den veks og utviklar seg og fint.  Ikkje har dei vore plaga av sopp heller enno.
Alle mine planter står på sydsida av huset, innimellom stauder og roser som gjev skugge om sommaren og det ser ut til at dei trivast med det. Eg må vel få meg tak i litt kalk å spandere på dei til våren.
I dag er det lett bris, 5,5C og regnbyer.

Helleborus corsicus/argutifolius - varigert?

Dette er to av dei seks plantene eg fekk av Helleborus frøa som vart sådde i 2010. Dei andre 4 var heilt normale, men 2 av dei vart alstå spettete. Dei er i god vekst og ser friske og fine ut. Er det noken som kan seie meg noke om korleis dette skjer. Er det sånt som skjer ved eit virusangrep og vert eventuelle barn  normale? Er det så pass sjelden at eg bør passe godt på plantene og ta avleggarar? Til å begynne med så tykte eg ikkje dei såg så fine ut og eg lurte på om dei skulle få livets rett i bedet, men eg ser no at dei veks seg kraftige og fine. Håpar det er noken som kan seie litt meir om dette.