PULSATILLA OG VÅRONN I STAUDEPOTTENE

Desse nydelege kubjøllene, Pulsatilla, er mi store glede no om dagane. Eg har nokre fleire som ikkje er komne i blomst enno, så eg er spent på kva slag farge dei har. 

For to veker sidan starta eg opp i drivhuset, då rydda eg litt og sette på varme. Så flytta eg dei nyprikla plantene ut frå planterommet og no står dei der og kosar seg og veks og trivast. Eg har og teke inn dei såpottene som har stått ute i ein og to vintrar og det er like spanande kvar morgon eg kjem ut om nye spirer dukkar opp. 

 No har det vore nokre fine dagar der eg har kunne sitje ute og sjå over staudepottene som har vore inne i det eg kallar veksthuset til overvintring. Som eg skreiv tidlegare så har mysene hatt fest og det var litt leit å sjå at av nokre sortar så hadde dei gjort reint bord. Men det er ganske mange stauder att, nokre er i god vekst og andre kan eg såvidt skimte liv i potta. 

Primula japonica her ikkje stått på musemenyen

heller ikkje denne sorten Geranium.

Clematisane har overlevd og dei er i god vekst.

 Etter at staudene flytta ut så har fuksiane fått flytta inn. No har eg potta dei opp og dei får jamleg dusj av det eigenproduserte lusekverken. Det kan sjå ut til at den virkar, for no ser eg ikkje meir til lusa.

Aspargesen har iallefall ikkje vore musemat, der er nesten hundre prosent overleving. Det vert både asparges og stauder å kjøpe etter påske, eg trur ikkje eg rekk å få klar lista før påska er over. So er det jo og kjekt å sjå at plantene er i god form før eg sender dei avstad. Då ynskjer eg dokke alle ei flott veke. Her skal det hagast og bakast i kommande veke.

Uvanleg tidleg blomstring

Først ute av alle dei eigenproduserte kubjøllene som eg har sådd. Kubjølle eller Pulsatilla har eg sådd kvart år sidan eg starta i 2010, men eg har liksom ikkje hatt heilt taket på det. Lite spiring og dårleg vekst har gjort at eg trudde det ikkje var så enkelt, men eg gjev ikkje opp i første omgang. Eg passar dei små spirene så godt eg kan og plantar dei ut i bedet når dei er såpass at eg ikkje renskar dei vekk når eg renskar ugras. I år ser det ut til at eg får løn for innsatsen, no står det mange småplanter rundt omkring som vil glede meg og dei som kjem på besøk med fine blomar. Namnelappane er borte for lengst så eg har ingen ide om artsnamn, men eg kan vel kanskje finne ut av det når alle kjem i blomst.

Kraftig flott primula.

Anemone blanda.

Det trur eg at dette er og.

Her blomstrar lungeurt og snart opnar Scillaen seg og. Den blå valmuesøstra kjem langt seinare, men dei er alle i god vekst.

Alpeklematisen har stor knoppar.

TID FOR Å SJÅ I OVERVINTRA STAUDEPOTTER M.M.

Vinteren i år kan knapt kallast vinter, men eg har bladd forbi 3 vintermånader og no er det vår. Eg starta rydding i beda 1. mars og no har eg snart gått runden. Den 11. mars plukka eg fram fuksiaplantene som har vore til overvintring og dei var komne lange spirer på og lus. Det er første gongen sidan eg sette dei der dei no står. Så no har dei fått ein god dusj med: 2ss raudsprit, 2ss matolje, 2 ss grønsåpe og ein liter vatn. Dei skal ha ein ny dusj om 2 veker så då får eg tru at plantene er fri for ubudne gjestar.

I går starta eg ryddinga i veksthuset og der hadde det og vore ubudne gjestar, men dei såg eg ikkje, og det er nok ikkje hjelp i å dusje heller. 

Det var heilt tydeleg at musene hadde hatt fest både på nokre stauder og nokre av knollane. Dei hadde nok gjort reint bord på favorittane sine. Eg har ikkje heilt oversikta over kva planter det er enno, eg konsentrerte meg om å vatne dei som har overvintra og det var mesteparten, og mange var godt igang med spiringa. Det var mykje meir liv i år enn den 7. april då eg starta ryddinga i 2013.

 Rabarbra

 Primula japonica

 Asparges

Pionfrø, her var det eitt frø som viste seg over jorda då eg sett inn pottene i haust og eg var litt uroleg for om den vesle spira kunne overleve vinteren. Men pionar er nokre tøffingar og no kjem det fleire spirer. 

FRØ AV MAGNOLIA SIEBOLDII

Ein av frøpakkane frå STA var Magnolia sieboldii. Desse frøa er utstyrte med eit frøskal som skal verte fermenterte i fuglemagen, før dei fell i jorda og veks opp. Dette har eg funne ut ved Googling og fann ut at det høyrdest rimeleg ut. Det er jo på langt nær alt som vert skrive på nettet som er rett, kanskje ikkje dette heller, men med kryssjekking og sunn fornuft så går det som regel bra. 

Dersom frøa er heilt ferske så skal det vere lett å få av skalet, men desse var små og tørre så deå måtte eg hjelpe naturen litt. 

Eg har hatt nokre dråpar oppvaskmiddel i litt lunka vatn og lagt frøa i. 

Etter 20 timar sjekka eg frøa for å sjå om det hadde skjedd noke og då såg eg at frøa hadde trekt godt med veske og at skalet gjekk av lett som berre det. Så då renska eg frøa, skolte såpa av og hadde dei i Zip-posar i fukta vermiculite. Dei bør få omlag 4 mndr i kjøleskåp.

 Så då får vi sjå om det kan verte magnoliabusker om nokre år.

FRØ FRÅ STA OG SÅING AV PIONFRØ

I dag fekk eg fruktene av arbeidet eg hadde i haust med å sanke frø og renske dei, for så å donere til STA. Ein stor velfyld konvolutt kom med posten og alt eg ynskte hadde eg fått, for ei lukke.
Eg hadde kryssa av for frø av pionar, det er ikkje dei kjappaste frøa å få planter av, men det er stort når eg finn spirer i pottene.

Her har eg stolt pakka opp alle frøpakkane, 30 pakkar ialt. No er turen komen til å få dei registrerte i Excel-arket mitt, så skal eg finne ut korleis eg skal så dei forskjellige sortane.

Eg starta med Pionfrøa, det er forskjellige måtar å gjere dette på, men etter som eg forstår så kjem alle måtane fram til spiring, det er helst eit spørsmål om tålmod. Eg har tidlegare prøv å legge frøa i zip-posar med mose på badet, for så å ha dei i kjøleskåpet, før eg sådde dei og hadde dei ut ilag med den andre staudesådden.

Eg har og sådd dei direkte og sett dei ut ilag med dei andre pottene.

Eg meinar at eg har fått spiring på begge variantane, men det har vore ein god del frø som har rotna.

I dag har eg rigga meg tel med vermiculite, den har eg fukta og her står han til avrenning. Denne metoden har eg frå ein svensk hageblogg, og frå Hagepraten sitt forum. 

Eg har skaffa meg 9 ulike artar og sortar frø, og som det går fram av biletet så er det stor forskjel i storleik. Det var og stor variasjon i kor mange frø det var i kvar pose, mellom 4 og 11 frø.

No har eg plassert alle posane med frø, vermiculite og plastspil med namn og nummer attmed vedaovnen i stova. Den optimale temperaturen framover no skal vere på 25 C og slik skal det vere i omlag 3 mndr. Posane må sjekkast ofte for å sjå om det er frø som myglar, det kan for ødelegge alle dei andre i posen og. Det er liksom meininga at no skal det kome rotspire på frøa medan dei ligg varmt, når det er kome rot så skal dei inn i kjøleskåp for å vidareutvikle seg, før eg har dei over i potte med jord.

Den som lever får sjå.

Julerosene er på veg, det same er dei nye skota på rosene.

I dag har eg hatt første dag med såing, eg har sådd masse staudefrø, i tillegg har eg sådd ulike sortar lobelia, blodbeger, pelargonia og asarina.

Jammen er det kjekt å komme i gang att. Eg trur? at eg skal så litt mindre sommarblomar, men eg har sålangt ei liste på 100 ulike staudesortar som skal såast i løpet av våren. Det tok litt av med bestillingar i haust, men eg reknar med at det skal gå greitt. I år har eg hoppa uti det og berre skrive nummer og årstal på lappane i staudepottene, det sparar meg for mykje arbeid med å skrive merkelappar. Det er jo ikkje alt som spirer heller og då er det like greitt. Det viktigaste er at det er lettare å tyde store tal, og så er det lettare å halde orden på kva for eit år frøa var sådde. 

Eg skal legge ut liste over staudesortane eg skal så når eg har fått frøa frå STA, i år har eg sendt inn frø så då kan eg få tildelt heile 30 sortar i første tildeling. 

Eg har vore heilt fråverande i bloggverda i lang tid, men no reknar eg med å livne til att, så no skal eg ta meg ei runde å sjå kva de styrer med rundt omkring.

God helg!

Ny mobil og nytt år.

Fekk meg ny mobil og no ser eg at eg kjem til å svette litt før eg får til å legge ut meldingar på bloggen med bilete.

Det er lenge sidan eg har vore innom, men eg har hatt ei fin førjulstid med mykje handarbeid, og då har eg ikkje brukt kreftene på alt som har med hage, såing og blogging.
No har eg fått fram alle frøposane, og skal til å så.

EG vil nytte høvet til å TAKKE ALLE for eit godt år og eg gler meg til å ta fatt på eit nytt år.
Eg vonar at alle som er innom bloggen er klar til å ta fatt på eit nytt år, og at vi kan dele hagegleder og hagesorger og anna som delast kan i det nye året.

 

 

Godt nytt år - og takk for det gamle!