Vårjamdøger

PLANTER FOR SAL OPPDATERT LISTE AUGUST 2016

Det er kanskje ikkje heilt tida for å kjøpe planter no midtsommars, men det er no eg har fått klar lista og dei siste ompotta staudene har fått vekse seg litt til i dei nye pottene. For planter som er prikla i 2015 så skriv eg årstal i parentes.

Nokre sortar har eg berre nokre få av og andre har eg i mengder av, avhengig av kor godt frøa har spirt. Det er nokre av plantene på lista som er forholdsvis store til å sende i posten, dei er mest for direkte salg, dei må i såfall sendast som pakke. Eg har sendt ein del pakkar i år, som har brukt 5 dagar på å komme fram og eg har fått melding  attende om at plantene var i god form då dei kom fram, så det vil seie at måten eg pakkar på er god.

Finn du noke av interesse så send epost til else53@hotmail.com med tinging. Dersom du ikkje kan ta imot plantene no på grunn av ferie så send tinging allikavel, då set er dei til side og sender når det måtte høve. I tillegg til pris så må du betale porto. Pengane kan overførast til 3741 10 25455 når plantene er mottekne og du ser at du er nøgd.

Ved å klikke på plantenamnet så får du opp ein link med bilete av planta.

Anemone - eg kallar ho haustanemone, er ikkje sikker på arten

Dette er bilete av morplanta. Blomstrar i august til oktober. Kr 30,-

Angelica gigas - raudkvann

Dette vert ei plante som både du og insekta vil like. Ho vil ha god jord med fukt og må stå på vekseplassen i eitt til to år før hø kjem i blomst i juli til august med ein fantastisk skjerm med purpurraude blomar. Dersom du vil så denne så må frøa såast ferske.  Kr 30,-

Anthriscus sylvestris Ravenswing - hundekjeks

To-årig plante som eg har kjøpt for bladfargen si skuld, fantastisk flott mørkt bladverk. Kjem med kvite skjærmar andre året i mai til juli. Frå 60 - 170 cm høg, vil ha det drenert, sol til halvskugge. Dersom planta får sjølvså seg så kan ein god del av frøplantene verte grøne som arten, plukk dei vekk og la dei mørke stå om du vil ha dei hagen.  Kr 30,- 

Aquilegia McKana Giant 

Fargerike store blomar på denne arten, dei er ikkje så lengelevande som dei andre artane eg har har i hagen, men eg dei er so flotte at eg sår dei gjerne omatt. 50 - 70 cm og trivast best i halvskugge. kr 20.

Aquilegia vicaria 

Blomane er kvit - lavendelfarga, vert 40 - 80 cm høg og vil ha sol til halvskugge Kr 30,-

Aquilegia viridiflora - grønakeleie

grøn/purpurfarga blomar på 25 cm høge stenglar. Sol til halvskugge  kr 30,-

Francoa sonchifolia 

Veit lite om denne planta i Noreg, men ho er vintergrøn, får rosa blomar i juni - juli og trivasti sol til halvskugge. Kr 20,-

Heliopsis helianthoides - glattsolauge

Høg staude, 90 - 140 cm, som får gullgule blomar i august til september, vil ha sol. 

Kr 30,-

Heliopsis heliantoides varigert - glattsolauge

Denne vert omlag 100 cm høg, får gule blomar i august til sepetmber, sol.

kr 30,-

Hesperantha baurii
Frøa til denne har eg fått frå svenske STA, men eg finn lite bakgrunnsstoff frå norske hagar om denne. Ho blømer i august til oktober med rosa blomar og vert 20 -  30 cm høg. Kr 20,-

Hosta sp - bladlilje (2015)

Frøa kjem av ulike artar med Hosta, avkommet vert sjeldan lik mora, og desse ser ut til å verte av den vanlege grøne arten. kr 20,-

Iris setosa
Denne irisen vert 30 - 70 cm høg og blomstrar med blå/purpurfarga blomar i juni - juli. Trivast i sol til halvskugge og i vatn 0 - 5 cm. kr 30,-  

Jasione laevis - sandmunke

Tørketålande låg staude, som får blå blomar i juni til august. Sol og drenert. Kr 20,-

Levesticum officinale - kjærleiksurt

Dette er ikkje ei staude, men ei krydderurt som veks seg stor og kraftig. Smaksrik og allsidig, sol til halvskugge. Kr 30,-

Luzula nivea - sølvfrytle/snøfrytle 

Gras som får kvite blomar i juni til juli. 20 - 40 cm høgt til fjellhage eller tørre parti, sol. 

Kr 20,-

Meconopsis baileyi syn Meconopsis betonicifolia - blå valmuesøster (2015)

Blomstrar i juni - juli med blå blomar på 60 - 70 cm høge stenglar. Trivast i fuktig jord i sol til halvskugge. Kr 30,-

Meconopsis regia 
Denne får lysegule blomar og vert frå 100 - 150 cm høg. Halvskugge. Kr 30,-

Meconopsis staintonii 

Denne valmuesøstra har raude blomar på stenglar som kan verte opp til 160 cm høge. Blomstrar i juli, vil ha sol til halvskugge. Ho er monocarp, det vil sei at ho dør etter blomstring, men ho spirer lett frø frø så det går an å framleis ha ho i hagen om ho får frøså seg. Kr 30,- 

Mitella makinoii

Ei nokso ukjend plante i Noreg, men den likar fuktige forhold i skugge til halvskugge, og skulle soleis høve godt. Får rosa/grøne blomar i juni til juli, 15 - 25 cm høg. Kr 30,-

Paradisea liliastrum - paradislilje eller liljegras

Denne vil ha det drenert og sol, vert 30 - 50 cm høg, visnar heilt ned etter frøsetjing, men kjem att neste år. Kvite blomar. Prikla 4 - 5 planter i kvar potte.  kr 30,-

Pardancanda norrisii - karamellilje (svensk namn)

Blomstrar i juli til september med blomar som er kvit med karamellfarga spettar. 60 cm høg, likar sol og er fin til snitt. Kr 30,-

Phytolacca americana - kermesbær
Busk som vert 2 meter høg og 1,5 meter vid. Dei unge skota kan etast, men ellers så er heile planta rekna for å vere giftig. Kr 30,-

Potentilla porphyrantha

Ei lita mure utan norsk namn som høver i fjellhagen. Får rosa blomar frå juni til august.

kr 20,-

Potentilla 'Snow Queen' - mure
Mure som vert opp til 60 cm høg og blomstrar mmed kvite blomar frå mai - august og trivast i sol til halvskugge Kr 20,-

Rosa glauca - doggrose

Busk som kan verte opp til tre meter høg, får rosa enkle blomar i juni og raude nyper om hausten. Kr 30,-

Silene pusilla 

Teppedannande låg silene som får kvite blomar i juni til juli, 15 - 20 cm, sol og drenert.

kr 20,-

Silene suesica - fjelltjøreblom

Kystplante som trivast i steinbedet eller på ein drenert veksestad i sol. Får mørk rosa blomar, 10 - 20cm. Kr 20,-

Silene zawadskyi

Denne kan trivast både i fjellhagen og god kompost som er godt drenert. Likar sol og får kvite blomar, 15 - 20 cm.  Kr 30,-

Tiarella wherry - luktskumblomst

Ei  25 cm høg markdekkande plante for halvskugge til skugge. Får rosa/kvite blomar i mai til juli. Kr 20,-

Trollius pumilus - småballblom (2015)

Dette er ein tett liten ballblom som kjem frå Himalaya og Kina og vert ikkje meir enn 15 - 25 cm høg. Blomstrar i mai til juni med små gule blomar. kr 30,-

1000 OPNE HAGAR - IKKJE FULLT SÅ MANGE - EG HADDE EIN AV DEI

 Pompomakeleie og fiolkongslys.

 Krypbrudeslør

 Paeonia 'Festival Maxima'

Paeonia 'Nordic Paradox'

Sist sundag den 26. juni var eg ein del av Hageselskapet sine 1000 opne hagar. Eg brukte litt tid på å ta avgjerda om å melde meg på, for det er jo noke med å invitere folk på hagebesøk på ein sundag då det er flust opp av tilbod som kan freiste.
Ikkje minst syntest eg det var vanskeleg sidan fleire som meinte at deira hagar på langt nær var fine nok til å invitere på besøk i.
Hageselskapet reklamerte med å opne hagen sin og sjå vekk ifrå at han ikkje var strigla og perfekt, men det er jo lettare sagt enn gjort. Det som eg tenkte utifrå var at eg har ein hage med ein god del stauder, eg har sådd dei aller fleste sjølv og såleis har eg ein billeg hage. Det treng ikkje koste allverden å få masse planter i hagen. Eg har alltid hatt interesse for hage og planter, men helsa strakk ikkje til å arbeide i hagen etter arbeidstid og å kjøpe stauder i massevis hadde eg heller ikkje råd til. 
Så tok livet mitt den vendinga at eg ikkje lenger kunne vere i arbeid og då har eg fått utfolde meg i det som på ein måte har vorte ei redning både fysisk og psykisk. 
No vart det ikkje fokusert på helsa min den dagen, mange av dei som var her veit tilstanden min, men hagegleda og kva som kan gå an å få til for ein rimeleg penge fekk dei delta i.
Det kom 16 besøkande på ein sundag med lett regn i lufta. Dei gav utrykk for at dei var godt nøgde, og at dei trivdest. 

For meg som hagevert så var det så ufatteleg kjekt å få vitjing av så mange hageinteresserte og få tre heile timar med hageprat, eg lever på ei høg bylje enno. Etter som eg forstår så skal Hageselskapet ha dette som aktivitet annakvart år. 
Eg kjem nok til å invitere til open hage kvart år sålenge helsa held og nokon vil kome. 

Facebook og blogging

Eg hadde aldri tenkt at eg skulle verte brukar av Facebook for venekretsen min er ikkje større enn eg bør klare å ha kontakt med dei utan å¨bruke nettet. Det heiter jo ven, så då tok eg det heilt bokstaveleg. 

Men so sit eg no her med ei masse av overskotsplanter av sågalskapen min og då måtte eg finne ein måte å få fortalt om plantene mine. Då var det at eg let meg overtale til å prøve Facebook. 

Det vart ei heil ny verd som opna seg og eg har funne massevis av lærdom der ogso, i tillegg til hagefora og hageblogging som eg har nytta tidlegare. 

Der er ogso ein del lukka grupper, der det nesten vert kravd at du har i det minste litt erfaring, og der det vert delt mange flotte bilete og mykje god informasjon om hage og planter.

Staudeglade på Facebook er ei slik gruppe og den kan eg trygt anbefale. Der er det mange med erfaring og kunnskap som villig vekk deler det dei kan. Så er det jo veldig kjekt at det vert kravd at vi brukar botanisk namn på plantene slik at alle veit kva for ei plante det er snakk om, og då får vi opp masse informasjon ved å bruke søkefeltet. 

Ja det er berre å innrømme, eg er ein ihuga brukar av Facebook.

SALG AV STAUDER

Det vart bra overvintring av staudepottene i vinter og no er dei i god vekst. Lista ligg til venstre på bloggen. Lista vil heile tida verte oppdatert, for det er stadig nye stauder av årets prikling som er store nok til å verte planta ut i bed. Eg kjem til å sende dei to første dagane i veka, då reknar eg med at dei er framme hjå mottakar før helga. 

OMPOTTING

 I går potta eg om tomatplantene i rein kukompost, det var ikkje alle som hadde vokse ut av potta, men i eg tok alle som var sådde først. Eg har to andre sortar som var sådde mykje seinare så dei skal få stå.

 Sommargeorginene fekk og komme i større potter med kukompost.

I dag var det dei største astersane som hadde flyttedag, det same hadde dei største pyntekorgene. 
Så no vonar eg berre på litt stabil nattetemperatur over 4 C, så eg kan setje ut dei små staudespirene. Eg kjem til å dekkje dei med fiberduk den første tida, men det er ikkje så gunstig med så kald jordtemperatur som det fort kan verte no i april, så eg trykkjer plass til alt eg kan i drivhuset. Eg veit av erfaring at det er utruleg kor mykje eg kan få plass til i eit tilsynelatande overfylt drivhus.

SNØKLOKKER OG KLOSTERKLOKKER

I 2015 sådde eg for første gong frø av Leucojum vernum og då vart eg klar over at snøklokker og klosterklokker er to ulike slekter. Eg har alltid trudd at det var same slekt. I dag har eg gått litt nærare inn i saka og sett at det som for oss vanlege plantefolk er lettast å skilje dei på er tal kronblada. Til venstre er det Galanthus nivalis og er ei vanleg snøklokke som dei aller fleste har i hagane sine. Dei sprer seg lett ved å setje nye løkar og ved frø. 

Dei til høgre er klosterklokke, Leucojum vernum og har ein større blom.

Båe klokkene har seks kronblad, på snøklokka er det tre store ytterst og tre små innerst. Klosterklokka har og seks kronblad, men her sit alle i ein ring ytterst.

Snøklokkene har ein blom pr stengel medan marsklokkenen kan ha fleire, så er det jo og stor forskjel på lauvet.

Løkane av begge desse er lettast å få til heilt ferske, dei bør helst flyttast med lauvet på. Det er vel difor så mange har vore skuffa då dei vil ha nye fine klokker i hagen, men løkane kjem ikkje att neste år. 

Eg ser og at det er litt ulike namn ute å går for det som eg kallar klosterklokke eg har funne både marsklosterklokke og marsklokke. Men eg trur at her omkring så er det klosterklokke som er vanleg. 

Cosmos atrosanguineus spirer

Ikkje så at det er ein sensasjon, men det er første gong eg har funne frø av denne arten. Sjokoladekosmos får berre sterile frø i USA og Europa, men ein gartnar i Russland sel slike frø, og eg har kjøpt dei av Seedsite eit frøfirma som eg ved eit tilfelle fann i år. Det var 10 frø i pakken, fem sprier kom opp, men den femte spira utvikla seg ikkje vidare så no har eg fire håpefulle att. 

Eg har tidlegare hatt ei sjokoladekosmosplante i potte, eg prøvde å overvintre den inne, men det vaqr ingenting att i potta då eg tok ho framatt om våren. Det kan jo tenkjast at dei hadde vorte mat for mysene. Får prøve att til hausten, dersom plantene veks seg store og fine igjennom sommaren.

God helg til alle!

Dei siste staudefrøa er klar for såing.

I dag har eg klargjort dei siste frøpakkane av stauder som eg har tenkt å så i denne sesongen. Eg  har brukt mykje tid på å finne ut av korleis eg skal merke pottene slik at dei vert lette å finne att i listene mine etter fleire år. Tidlegare så skreiv eg berre namnet på frøsorten, då fekk eg problem med gamle såpotter som det ikkje kom spiring i. Eg pleier å tømme dei som ikkje er spiring i på komposten etter tre sesongar. Det kan jo tenkjast at det er frø som treng endå lenger tid på å spire, men då ventar eg ikkje lenger. Så hadde eg eitt år då eg berre skreiv nummer og årstal, men det vart altfor mykje styr når eg måtte inn og sjekke sålistene etterkvart som nye spirer dukka opp. Så no merkjer eg med nummer/årstal og namn. Då har eg ein god backup i tilfelle at pc-en skulle låse seg. Eg har rett nok lagra dei viktige filene på ein ekstra harddisk, men dette er ein grei måte å gjere det på.

No har eg 176 sortar, men eg ser jo at Aquilegia ...McKana Giant har eg tre sortar av, eg synest dei er så flotte og første gongen eg sådde så var det ikkje så god spiring. Eg kjem til å legge inn lista oppe til venstre på bloggen seinare. 

PRIKLA TOMATAR I DAG

I år har eg sådd 23 sortar tomatar. Eg har plass til 24 planter i drivhuset så det vert velfyllt i år ogso. No er det nokre sortar som er frilandstomat og dei har eg tenkt å ha ute. Dersom sommaren vert fin så vert det nok tomatar der ogso. 

Ein av sortane heiter Solanum spontaneum, den anar eg rett og slett ikkje noke om, men det er jo spennande å prøve. 

SPIRING I STAUDEPOTTENE

I dag har eg plukka fram staudepottene frå vinteropplag. I fjor måtte eg kjøpe nytt teltdrivhus, det synte seg å vere av så dårleg kvalitet at saumane rakna då det vart litt vind. Så då måtte vi finne alternativ oppbevaring og det vart  til at mannen min rydda plass i vedboda og der har dei vore i vinter. Det har vel knapt vore kuldegrader, men litt var det nok i januar. 

Ved første gjennomgang så ser det verkeleg ut til at dei fleste plantene har overvintra godt. No står dei ute i regn og snø, men så snart det vert god varme i lufta så skal ha gjennomgang på dei og sjå korleis det står til.
I dei to pottene som står bak er det er det trepion og ein meir ukjend som eg sådde i 2015 og som det er masse spiring på.
Pottene framme er frå 2013, 2014 og 2015. No står dei inne i drivhuset ilag med sommarblomane som er i god vekst. Dei kunne godt ha stått ute framleis, men ved at dei no får komme inn i varmen så kjem dei raskare i vekst og eg kan få prikle dei. I dag har eg tenkt å ta inn pottene som eg har sådd denne vinteren slik at dei og kan få komme igang. 

Frøliste 2015 - frø for sal.

 Her ligg frø av sommarblomar og stauder som er samla i hagen og tørka. I år vart det så mykje at eg har laga ei frøliste, ligg oppe til venstre på sida, der dei som er interesserte kan kjøpe.

Ei skål full av frø frå Angelica gigas. 

Stauder for sal

Det har teke si tid før det vart lagt ut liste over planter for sal dette året. Ein god del stauder vart musemat i vinter, forsommaren var kald og treg og sommaren har vore familiesommar. Men no har eg ein god del fine planter ståande dersom det er interesse. Nokre sortar er det berre få att av og andre har eg mykje av. Eg sender dei to første dagane i veka, for at plantene skal kome fram før helga og ikkje vert liggane over helga i ein varm  butikk. 

På venstre side her på bloggen ligg lista over staudene eg har i 2015. 

IKKJE KVAR DAG EG HAR NETT

Kvart år sår eg Flittige Lise og dette er ein av to variantar som eg har sådd i år. Impreza Sherry Splash er namnet.

Denne her Pulsatillaen derimot, veit eg ikkje namnet på. No er eg sovidt igang med å herde sommarblomane. Det har vore kjøleg om dagane og om nettene så har det vore ned mot null, og då vert ikkje det herding, men stopp i utviklinga av plantene. Så no er det ein herleg runddans med fiberduk av og på.

Tomatsesongen er i gang

No er det snart eit år sidan siste blogginnlegg, fekk det ikkje til å blogge frå mobilen og så fann eg ut at eg fekk halde oversikta på annan måte. MEN no ser eg at eg ikkje kan klare meg utan blogginga. Det er ei ypperleg anledning til å gå attende for å sjå korleis det har vore tidlegare. 

Sidan sist så har eg oppretta profil på Facebook, det er jo kjempeenkelt å bruke til å legge ut bilde og informasjon til dei som er planteinteresserte rundt meg, men som dagbok til å gå attende i er det ikkje noke særleg godt alternativ. Så no er eg attende i folden og det vert kjekt å følgje med i alle bloggane til dei eg hadde kontakt med tidlegare. Eg ser at de har vore aktive med innlegg så no skal eg ta ein kik.

Men i dag har eg planta tomatane opp i plantekassane, den første blomen synte seg i dag. Det må vere minst ein månad enn nokon gong før. 

I år har eg hatt plantene i drivhuset sidan februar og dei har aldri vore finare enn i år. Det har nok gått ein del meir straum, men du og du for ein fryd det er å komme inn i huset å sjå alt som er på gang.

Dersom det er noken av dokke tidlegare trufaste som les dette så kan eg seie at eg har det bra. Det har vore eit godt år for meg og mine. For eigen del så kan eg vel seie at takka familien og drivhuset og plantene så har eg det bra. 

NYE STAUDER ER KLAR FOR SAL

No har eg endeleg fått oppdatert lista over stauder som er for sal. Nokre sortar har altfor mykje av og andre er det berre få av. Men no er dei klar for å flytte ut i verda. Eg har enno mange priklepotter ståande med nye sortar så det vert nok minst ei oppdatering til før sesongen er omme. Lista ligg oppe til venstre. 

FULL FRES I HAGEN

Våren og sommaren solangt har vore uvanleg varm og fin dette året. Det ber plantene i hagen og preg av. For mange planter sin del så er dei tre veker tidlegare enn vanleg. Det er knapt så eg rekk å registrere alt som skjer, langt mindre få det notert og kommentert her på bloggen. Det var jo det som var den eigentlege grunnen til at eg starta blogging. Eg kjem nok til å angre at eg ikkje tok meg tid neste år og seinare når eg skal gå attende for å sjå kva som skjedde i 2014.

Alle akeleiene står i blomst og dei har eg mange av.

Silene asterias, stjernesmellene, mine er og riktblømande.

Mertensia pterokarpa, steinøsterurt, står med sine yndige blå blomar. No har eg massevis av Mertensia virginica, klokkeøsterurt, som står og veks seg til i potter. Sålangt så er dette ei planteslekt eg vil prøve meir av.

Dette trur eg må vere Primula ioessa, men eg har iflg. listene mine ikkje sådd den før i år, så sanneleg om eg veit. Fin er ho.

Akeleie med mange skjørt.

Aquilegia McKana Giant, ingen tvil om det.

Fantastisk intens farge på nyutsprungne humleblomar. 

I går tok eg opp tulipanløkane som stod i det kombinerte tulipan/georginebedet. Eg jordslo løkane slik at det kanskje vert like fin bløming neste år. Eg kjem nok uansett til å kjøpe fleire løkar for erfaringa er at dei foredla sortane ikkje kjem så godt att som dei gamle gule og raude. Bedet har vore gjødsla med beinmjøl, no hadde eg på hønsegjødsel og kompost før eg planta georgineknollar og dei villgeorginene som er sådde frå frø, samla i 2013. 

MAIBLOMSTRING

No skjer det så mykje rundt meg at blogging kjem langt ned på lista. Men her kjem litt av blomstringa no. Dette er ein Meconopsis, som eg ikkje er heilt sikker på arten, lappen er sjølvsagt over alle vidder.

Sist ut av Pulsatilla. Denne er og ukjend.

Aquilegia flatabellata Alba

 Dodecatheon

 Meconopsis dette og, den er heilt lik den over med unnatak av fargen.

 Her står plantene attmed einannan.

 Duppesoleia har fått ein fiolkongslys framfor seg.

 Dei vanlege valmuesøstrene, Meconopsis baileyi, har eg mange av både blå og kvite og no har dei starta blomstringa.

Dei vanlege kongslysa er og i gang såvidt med blomstringa.

God helg til alle bloggvener!

Paeonia veitchii, veitchpion

 

Denne har eg fått fram av frø, og det er min første eigenproduserte pion som blomstrar, og eg er kry som ei høne.

Han var prikla i 2012, så det har gått ganske radig, men så skal dette vere ein av dei enklaste pionane å få til. 

Susanna Widlundh seier i boka Pioner at alle må unne seg minst ein pion i hagen, og for den usikre så kan det vere greitt å starte med Paeonia veitchii. Det er ein villpion , opprinneleg frå Vest-Kina og er svært herdig.

Blomstring i mai med to til fleire blomar på kvar stengel. Fargen kan variere frå lys rosa til ein blåraud nyanse. Bladverket får vakker haustfarge. Det er ei svak roselukt av den eg har i hagen. 

Høgda er omlag 50 cm, og den treng nok ikkje å verte bunden opp.

Blomsten er nedoverbøygd, så eg måtte legge meg på bakke for å ta biletet, men eg har vel godt av litt bøy og tøy.

TULIPANBLOMSTRING

Tulpanbedet mitt er veldig flott, tykkjer eg. For eingongsskuld så har eg fått tulipanane ned i jorda slik at fargane harmonerar. Når tulipanane er avblomstra så tek eg dei opp og lagrar dei til hausten. I mellomtida så er det knollgeorginene som rår plassen. I år vert det ein del knollgeorginer, men mest villgeorginer som eg har fått fram av frø.

Dette er utsikta frå gangdøra i går. Akeleiene er snart i full blomst, mange av pionane har fått farge på knoppane og eg trur at valmuesøstrene står og med store knoppar.

God helg til alle som er innom!