Det er ikkje ofte narcissane, eller det som eg kallar påskeliljer, blomstrar til påske. I år kunne eg plukke inn ein bukett med påskeliljer, pulsatilla, tulipan, kuleprimula og greiner med grønt lauv på jasmin.
Eg har ei lita blåveis, importert til vestlandet av ei tante for meir enn 20 år sidan, tanta er død, men eg prøver å halde liv i planta. Det vert nok aldri noke teppe av blåveis hjå meg, men kvitveisa lyser fint opp på bøen til naboen.
Det er frydefullt å ha eit stort nesten tomt bed klart til å ta imot alle småplantene som no er i god vekst både på planteromet, drivhuset og ute.
Peonane strekkjer seg.
Helleborus orientalis, eg har ei plante i bedet, mange frø er sådde, så eg reknar med det vert mange fine planter etterkvart.
Dette er ein annan peon, kjøpt før den store hagegalskapen med namn på alt, ilag med ei julerose på hell. Denne kjøpte eg billeg i vår og har pynta opp framfor inngangsdøra. No skal ho stå midt mellom to peonar.
Dette er den andre naboen.
Rosene i venstre bildekant vart klypte 18. april, då var det musøyre på bjørka, i dag er det vel kattøyre. No har eg gjødsla med beinmjøl og lagt på eit godt lag med kompostert hestegjødsel. Bedet til høgre skal fyllast med litt stauder, masse georginer og sommarblomar.
Denne raude pulsatillaen kjøpte eg for nokre år sidan og no står knoppane og blomane i kø.
Denne kvite pulsatillaen står bak den raude og er litt blyg, men veldig fin den og.
Skota på georginene er i god vekst, det er noken få potter som ser ut til at eg må vente lenge på liv, men eg har tid til å vente litt til, så får vi sjå.
Klokkeranker i god vekst.
Kentuckykaffiplante.
No er det nye teikn på vår kvar dag, vi har klypt plenen to gonger, i dag så eg to svaler, 23. april var linerla på plass. Bøndene er i full gang med vårvinna. Vegane er fulle av svarte bremsespor. Eg har hatt min første terassepils, og dei siste dagane har høgste punktet på kroppen vore halebeinet.
LIKNINGA ER LEVERT!