Eg har planta eit rosetre......

Biletet over har eg kopiert frå Spanne plantesalg i Haugesund, der eg kjøpte rosa, etter god rådgjeving.   Det er Rosa wichuraiana, New Dawn, ei slyngrose som kan verte heile 6 m. Eg har planta ho attmed eit epletre som er ganske høgt og ynskjet mitt er at ho skal vekse godt opp i treet og boltre seg der. Fargen er sart rosa som biletet viser, blomane er begerforma og halvfylte og dei er medium parfymerte. Rosa hadde sin start på  Sommerset Rose Nursery  i 1930, så det er ikkje noka moderne rose. Lauvet er lysegrønt og skinande og det ska vere ei frisk og hardfør rose opp til H6. Det er første gongen at eg plantar rose for at ho skal vekse opp i eit tre, så eg er rimeleg spent på om det er noke som let seg gjere her på veirharde Vestlandskysten, men det er forsøket verdt. 

Eg gler meg til at rosa veks seg til og blomstrar, då skal eg sitje ved drivhusveggen og nyte tilværet endå meir enn no.

Det var jo lite tenkt at eg ikkje trykte ned ein klematis på same tid, så det trur eg at eg må få gjort med det aller første, så vert det endå meir å glede seg over.

JULEFØREBUING I MAI

                                    Romtopf

Oppskrifta er Camilla Plum som er ansvarleg for, og det er tredje året at eg lagar denne luksusdrikken/desserten. Eg kjem ikkje til å ha så mykje heimelaga ingrediensar, det vert jordbær, bringebær og kirsebær frå eigen hage. Resten kjem frå norske og utanlandske fruktdyrkarar og romen kjem frå Havana. I dag var det aprikos og nektarinar som vart starten. Så no skal Norgesglaset/glasa stå i spiskammerset og godgjere seg og få stadige påfyll av frukt, rom og sukker fram til vesle julaftan om kvelden. Då er det tid for ein aldri så liten smaksprøve av heimelaga Romtopf og andre gode heimelaga julelikørar. Lenge å vente - men så absolutt verdt det. 
Men innan den tid skal eg ta til meg alt det som den kommande årstida har å by på og ha det som ballast når hausten og vinteren kjem.

Travel våronn

Ipomea purpurea, Milky Way, har gleda meg med første blomst idag, og dei er verkeleg lekre.

 No har vi hatt temperatur godt over 20 i fleire dagar og då kan eg ikkje ligge på latsida med så mange sommarblomar, biletet over, og stauder, biletet under, å vatne. Heldigvis så kjem det noken som gjerne vil kjøpe planter til bed, potter og kar. Men det er litt som Sareptas krukke, det ser ikkje ut til å minke, for plantene veks og treng heile tida nye potter, så då ser det ut som det er like mykje kor mykje eg sel. Eg har ikkje så stor kundemasse heller, men det er kjekt å få avsetnad på det som vert til overs.

 I drivhuset viser tomatplantene heilt tydeleg at det er varme som skal til. 

Utsikt frå gangdøra i kveld.

 Aquilegia, Niedrige Mischung, ei låg akeleie med fleire fargar som eg sådde i fjor og som no byrjar å vise fram dei flotte fargane sine.

 Nydeleg vårflox,

 Raud Pulsatilla.

 Endeleg vart det blomstring å frukttrea, i år vert det vel frukt og. I 2011 kom blomstringa så tidleg at det var lite insekt, og etterpå kom det frost og vind så då rauk heile frukthausten.

 Snart er pionane i fullt flor.

Meconopsis quintuplinervia, klokkevalmuesøster, desse har eg fått av Reidunn på Røra. Det er dårleg farge på dette biletet, skal prøve å ta eit betre bilete seinare.

For 2 dagar sidan blomstra heggen, eg kunne ikkje sjå blomar på heggen nær meg, men lukta var ikkje til å ta feil av, og i dag stod heile treet pynta i sin finaste stas.

SOL

Langtidsvarsel

Søndag20. mai	Mandag21. mai	Tirsdag22. mai	Onsdag23. mai	Torsdag24. mai	Fredag25. mai	Lørdag26. mai	Søndag27. mai
11°	15°	18°	18°	17°	17°	17°	16°
0 mm nedbør i døgnet	0 mm nedbør i døgnet	0 mm nedbør i døgnet	0 mm nedbør i døgnet	0 mm nedbør i døgnet	0 mm nedbør i døgnet	0 mm nedbør i døgnet	0 mm nedbør i døgnet

Denne rekka har eg venta på i heile 2012! Endeleg!

TUSENFRYD

Bellis perennis, Tasso Erdbeersahne, er ei staude som eg sådde i 2011, og som eg har planta ut i hagen. Det namet som er vanleg å bruke er Tusenfryd og det stemmer for denne sorten. Eg har teke meange bilete av ho, er vert heile tida imponert av fargevariasjonane på blomane frå knopp til utblomstra blomst. Dei står attmed hellegangen opp til drivhuset så er ser dei mange gonger for dag, og eg trur ikkje eg går forbi ein gong utan å nyte dei.

Dette innlegget skriv mest fordi eg vil melde meg på Marit sin GiveAway.

Hadde eg vore heime no så skulle eg gått i drivhuset og teke bilete av den flotte Engletrompeten som eg vann tidlegare på bloggen hennar, men den skal eg vise fram seinare. 

TOMATPLANTENE PÅ PLASS I DRIVHUSET

 I går kom 24 tomatplanter plass i vekstkar i drivhuset. Det er nokre planter som eg ikkje har fått plass til enno, noken er frilandstomatar og dei skal eg prøve å plante ut når temperaturen kjem seg litt.

 Ei av plantene er Black Brandywine av frø frå Camilla Plum. Den og nokre andre planter har fått blomst, å so kryssar eg fingrar for god avling slik at eg kan lage mange glas med "henkogte tomatar" etter den same Camilla si oppskrift. Dei glasa som eg laga i fjor var iallefall ein suksess.

Dette er noke av den mest fantastiske bønne eg har sett. Eg kan vel ikkje skryte på meg å ha sett så mange variantar heller, men denne er flott. Det er Dolichos labab, 'Ruby Moon' etter frø frå Impecta. Bønnene ser ut som små skinnpungar med perfekt saum rundt kanten.  På biletet under er blomsten. Dette er prydbønne og dei er varmekrevjande, så plantene skal få stå til pynt i drivhuset til det vert godt og varmt ute. Etter som eg har lese meg til så må prydbønner kokast før dei kan etast, på grunn av at dei er svakt giftige, men desse er altfor vakre til å verte oppetne. Det er stor prydverdi i blomane og, i grunnen så er heile planta svært fin, med vakre lauv med eit nydelege nervetrådar.

Så er det utsikta frå gangdøra 7. mai 2012, beda vert heile tida litt fyldigare.

KALDT

 Tellima grandiflora, etter frø frå UnaCita i 2011. Ei for meg ukjend staude, men heretter skal ho få plass mange stader i hagen. For ei vekstkraft og flott farge på lauvet. Desse står i skuggen og er finare enn dei som har meir sol. Eg vert glad kvar gong eg går forbi berre av å sjå slik energi.

 Fruktblomstringa er heldigvis sein i år, dersom den hadde vore igang no så vil eg tru at alt hadde vorte øydelagt. For no er det kaldt.

 I ettermiddag kom det såpass med snø at det la seg på blomane, men eg reknar med/håpar inderleg at det ikkje vert såpass at dei vert knekte. Dette er ein pion som har fått glasur.

Til slutt må eg ta med bilete av bilete av bilen som har fått topphue på øyra. Han har ei av same slaget på andre sida. Rett nok er det isande nordvest, med hagl og snø i byene, men så pinglete bil har vi no ikkje kjøpt. Forklaringa er at det er ei kjøtmeis som truleg har funne ut at han er ein rival. For så snart våren kjem så går ho/han til åtak på speglane. Så difor må huene på plass. 

Til natta er det spådd -3, så i kveld har eg sett på ovnen i drivhuset att. Eg hadde nett sett ovnen vekk, for eg rekna med at plantene ville tåle ned mot null, men ikveld tok eg ikkje sjangsen på at det ville gå bra. Det er no uansett ikkje så bra for plantene med slike kuldesjokk. No er det snart så fullt der inne at eg må stå i døra å spyle for å få vatna alle pottene. 

God helg og god veke til alle Hageglade som er innom bloggen!